Luk 21 | WRS | STEP | Yesusva wonlohvna tempelduvra, himba sembayangnindm nongal lohvna, sen momnanam velaihakov vevna disumbra. No dinindva ambvnamba, hevna diva velaihakov vevna disumbra, doa heva mongo peliongo himba pronamba, sen olpeli sambla vilipipihowoli no disumbra, himba ambo nis amana vevna innehui.

Luke 21

Yesusva Ishunna Indhanam Peliongona Wevsam.

Mak 12:41-44

1 Yesusva wonlohvna tempelduvra, himba sembayangnindm nongal lohvna, sen momnanam velaihakov vevna disumbra. No dinindva ambvnamba, hevna diva velaihakov vevna disumbra, doa heva mongo peliongo himba pronamba, sen olpeli sambla vilipipihowoli no disumbra, himba ambo nis amana vevna innehui.

3 Yesus unna no indhanam, hona pelina wevsava doa wohkuvhoawol vei no dinindnamba. No dinindva himba mindnam diva iaevulvna, wo noinda himba mindnamba dembhapuv vevna disumbra. Heva os no peliongoriniva, himba owai iavnamoa, himba nongas velaiwo avna olpeli, mongova owainonoa.

Yesusva Unna, Tempelduvpa Si Wohlohvavmoa Yunalmba.

Matiu 24:1-2, Mak 13:1-2

5 Hevna aonghal mahalnind opulvona, hona pina tempelduvpa hevm enesmosal lohv. Holva hevm hon besalna lellohv, wo merava huhmohva besalna vrina, Sesoam vinina.

Doa Yesus unna, memba honamba yimba besalva nunglivpa, si lohvavmoa yunalmba. Owai, ungund si taka vivav, wo no honpulva si tetga vipungu vevav indakonda.

Yesusva Unna, Sikoklava Si Yemba Wiki Vewol Vevav.

Matiu 24:3-14, Mak 13:3-13

7 Hevtindiva umnina, henanam honamba si phovav tempellava? Manam si kava nunglivav, osmba ora, doa murapeta dihi vev?

8 Hev unna, yeoa novkaka aevvm, indhanamba mindnam yemba si dasalmba deiswitvrava. Mongova ovra, kava Kristus proi, mongova ovra, murapeta Kristusva prolm vev. Manam yimba hilwilvav. 9 Yimba si os hilwilavra moamba, no kembella daos ohov mongnind mongnind hevm. Wo heva os manam yimba pemba vivav. Sna sikoklasna si phovav miva, heva os pethava lelnamba mueisowa vevavmoa.

10 Mongnind mongnind hevm ahalvamana vevav di di di, wo nenvpa mendekli si vungu vevra mongnahalmba. Owous, uvavulmendekli phungu vevra. Si mana vema mendekli ovmerini phovav, indhanamba seilva nunglinamoa, wo noinda himba pepeh wohvivra.

12 Honamba si phovav pethara, heva os seilmba yemba si indhanamba kekaiv vivav, kin huhlinvav. Yemba si sembayangduvra wetat vewol vivav, doa hukumda wolasuv vevav. Yemba duanginda wetatmomba ishunvav, Yesustindi. Heva os manam yimba duus vivav, ishunu kana nemelmom. 14 Manam yimba mindnamba nengavnang vivra osva, si manamoa kava ishunvra ungundmba, owai. Kava kav nonamba yena nengavnangmba otuhtinvav, osmba ungundmoa os ishunu. Doa no ungundva yena moamba pilpikovinvavmoa, wo yemba osva unvavmoa, yimba gekala uv.

16 Yena arapev eteboasalapev mongawatindi, himba eva yemba wetat owol vivav duanginda. Wo monglava yemba helvakomo vivra. 17 Indkumbiva yemba musk vinvra, noinda himba Yesustindi lovahv. 18 Heva os yemba si vitivhoavavmoa, maim ora, ta kurini lohv, mongova tamba velavhoavavmoa yenamba. 19 Yeoa keknamangas lovaho, osm si yimba vuhe besal wohkuvhueivav, aevulalm yunalm.

Yesusva Unna, Ungundva Si Yerusalem Kotamba Kulthoalm Vivra, Nonamoa Yeoa Buketho.

Matiu 24:15-21, Mak 13:14-19

20 Sism yimba si nungeilvav, ungundva ambvra, Yerusalem kotam kulthoalm, doa yimba ningvav, osva himba tetga velm viv. Yimba kotanindva, yeoa gapiavm oloram. Wo eva nomba osoruvrava temba aevulvrava, manam saivvav kotarava, weilmonam bukethara. Yutia provinsnind indkumbinahonam gapiara.

22 Wo nonam si Sesoava hevna Israelnindmba indkokla vewol vevav. Himba wohengvav hevna doaraminimom, ten novol velohvm. Doa nonamba ungevliriniva enamba avrava, wavra. Eva himba nomba tovoliva otolmba lingungavrava, wavra. Si es eva vivav? Sesoava si indhanana indkoklamba esesm vinvav hevmba, doa Israelnindmba indkumbimba si hemba indkokla vinvav hevna indkoklarava. 24 Ungundva si Israelnindmba helvakomo vivra ovlakasna, wo eva monglamba wulbukethavav vavawonam, hukum vewolalm. Doa si os ungundva tetga vivav Yerusalem kotamba. Doa no indhana si os vewuvra, Yerusalemba monglana datho vruwuvra, verava, Sesoa unvavm, doa.

Yesusva Unna, Kava Arana Ombol Lohv, Kava Henga Si Provav Petharamba.

Matiu 24:29-31, Mak 13:24-27

25 Si mana vema ovrini phovav okombara weisra paira. Nonamba pethanindna undva si lohvhoaprinvavmoa beswonamba owai, manara, wanplomb kukungu vevra mindnam, weitva noinda mindnam ovra, wo himba mindnam nengavnang vivra, pem vivra. 26 Mana vema mendekliva ovmeriniva si nenvmsna vevav. Wo noinda pethanindva wohkokoral vevra daimindilmsna, pai mani pimba snamba nongalphov?

27 Doa indkumbiva si os kamba nunglivav, kava provrava hengava petharamba tekomerava. Kava Sesoana pusambanakambara keknamangas provav. 28 Hona mana vemamba yeindava phunvrava, wo yeoa pulvovm, nov velvohvm osm, Sesoava murapeta ata pimba vuhe besalla sandhavav.

Yesusva Olhmona Unna, Timba Yemba Numhowol Viv.

Matiu 24:32-35, Mak 13:28-31

29 Yesus olhmona unna, yeoa timoa nunglivm, denwitm eva ombatim, timba ningilva nonamba peholothavpa, yimba ningvav, memba ponanam. 31 Wo yimba honamba nunglivrava, memba yemba kava ishuniva, doa yimba si os ningvav, murapeta si Sesoatindiva nemelva muserava avav. 32 Monglava yimba mendah lovahvra, si yimba os nunglivav novnamba. 33 Oviva pethaiva si mueisowa vewolvav, heva os kana moamba si wohlohvav, wo si wohengivav.

Yesusva Unna, Yeoa Novkaka Aevulvm.

34 Yeoa novkaka aevulvm, si homeis kava prorava, yemba yumna vewolvav. Manam yimba mindnam petharinimba ningvav, osmba bia hlavra, dai ovra, wo eva petha men nonapopol lohvm. Kava nonamba indkumbimba pethanindmba yumna vewolvav, maim ora, miem bunena monashalla lui. 36 Yeoa novkalana aevulvm, Sesoam sembayang vinivm, os himba yemba keknamangas vinvav, wo yimba henanapopol no kinmba wohkuvhoawol vivra. Doa osva yimba kana novra lovahthamnavav, wo kava yemba beswonamba nongalvav, yimba lous vrivavmoa.

37 Yesusva os velohvna, okombanamba tempelduvra wonishomana vevna indhanam, sinimba himba mongona kembella lilohvna olora, os ningthiv oliv denwit. Indkumbiva himba simekumbranonoa kusolvohvna tempelduvra, hemba hellelmba.